فلاحی کمیٹی مجاہد آباد کے زیرِ اہتمام اجتماعی قربانی، سینکڑوں مستحق خاندانوں میں گوشت تقسیم
جہلم:فلاحی کمیٹی مجاہد آباد کے زیرِ اہتمام عیدالاضحیٰ کے موقع پر حسبِ روایت اس سال بھی اجتماعی قربانی کا اہتمام کیا گیا، جس کے ذریعے مستحق اور نادار خاندانوں کو عید کی خوشیوں میں شریک کرنے کی کوشش کی گئی۔
فلاحی کمیٹی مجاہد آباد کے صدر چوہدری عبدالرشید کی فیملی کی جانب سے 15 بکروں کی قربانی کی گئی۔ قربانی کے بعد گوشت کو منظم اور شفاف طریقے سے تقسیم کرتے ہوئے سینکڑوں مساکین، نادار اور مستحق خاندانوں تک پہنچایا گیا۔
اس موقع پر چوہدری عبدالرشید نے کہا کہ عیدالاضحیٰ ہمیں ایثار، قربانی، بھائی چارے اور ضرورت مندوں کے ساتھ خوشیاں بانٹنے کا درس دیتی ہے۔ انہوں نے کہا کہ معاشرے کے کمزور اور مستحق طبقات کی مدد کرنا ہم سب کی مشترکہ ذمہ داری ہے اور فلاحی سرگرمیوں کا یہ سلسلہ آئندہ بھی جاری رکھا جائے گا۔
انہوں نے مزید کہا کہ اجتماعی قربانی کا مقصد صرف مذہبی فریضے کی ادائیگی نہیں بلکہ ان افراد تک خوشیاں پہنچانا بھی ہے جو معاشی مشکلات کے باعث قربانی کرنے کی استطاعت نہیں رکھتے۔
اہلِ علاقہ نے فلاحی کمیٹی مجاہد آباد اور چوہدری عبدالرشید کی فیملی کے اس قابلِ تحسین اقدام کو سراہتے ہوئے ان کے جذبۂ خدمت کو خراجِ تحسین پیش کیا۔ شرکاء کا کہنا تھا کہ ایسے فلاحی اقدامات معاشرے میں ہمدردی، بھائی چارے، باہمی تعاون اور سماجی ہم آہنگی کو فروغ دیتے ہیں۔
تقریب کے اختتام پر ملک و قوم کی سلامتی، خوشحالی اور مستحق افراد کی فلاح و بہبود کے لیے خصوصی دعائیں بھی کی گئیں۔
