راولپنڈی تعلیمی بورڈ ویلفیئر ایسوسی ایشن کے انتخابات، شاہین پاسبان گرینڈ الائنس کاکلین سویپ

سوہاوہ: راولپنڈی تعلیمی بورڈ ویلفیئر ایسوسی ایشن کے انتخابات میں شاہین پاسبان گرینڈ الائنس نے شاندار کامیابی حاصل کرتے ہوئے پوٹھوار اخوت گروپ کو بھاری اکثریت سے شکست دے دی۔

ہفتے کے روز ہونے والے ان انتخابات میں دن بھر گہماگہمی رہی، دونوں گروپ اپنی اپنی کامیابی کے دعوے کرتے رہے، تاہم پولنگ کے اختتام پر شاہین پاسبان گرینڈ الائنس نے کلین سویپ کرتے ہوئے میدان مار لیا۔

چیف الیکشن کمشنر افضل بھٹی نے اپنی ٹیم کے ہمراہ پولنگ کے بعد ووٹوں کی گنتی مکمل کی اور باضابطہ نتائج کا اعلان کیا۔ جاری کردہ نتائج کے مطابق صدارتی نشست پر چوہدری عمران یونس گجر نے 178 ووٹ حاصل کر کے کامیابی حاصل کی جبکہ ان کے مدمقابل راجہ عثمان شہزاد 127 ووٹ لے سکے۔

سینئر نائب صدر اول کے لیے چوہدری محمد آصف خان نے 185 ووٹ حاصل کیے جبکہ سینئر نائب صدر کی نشست پر چوہدری محمد رفیق گجر نے 172 ووٹ لے کر کامیابی سمیٹی۔ نائب صدر کے لیے ملک الطاف حسین 193 ووٹ حاصل کر کے کامیاب قرار پائے، جبکہ جنرل سیکرٹری کے عہدے پر چوہدری معاف علی مبارک 181 ووٹ لے کر فاتح قرار پائے۔

اسی طرح قاضی محمد رفیق نے 191 ووٹ، ثاقب افضل ہاشمی نے 201 ووٹ لے کر جنرل سیکرٹری اول اور دوم منتخب ہوئے۔ ملک ثاقب مسعود 184 ووٹ لے کر ایڈیشنل جنرل سیکرٹری منتخب ہوئے جبکہ ملک عرفان فیاض نے 200 ووٹ لے کر جوائنٹ سیکرٹری کا عہدہ حاصل کیا۔

سیکرٹری مالیات کے لیے ماجد جہانگیر 182 ووٹ حاصل کر کے کامیاب ہوئے، بلال گوندل 197 ووٹ لے کر سیکرٹری نشر و اشاعت منتخب ہوئے، جبکہ سیکرٹری لیگل امور کی نشست پر نوید ظفر نے 208 ووٹ حاصل کر کے شاندار کامیابی حاصل کی اور سب سے زیادہ ووٹ لے کر نیا ریکارڈ قائم کیا۔

نتائج کے اعلان کے ساتھ ہی شاہین پاسبان گرینڈ الائنس کے کارکنوں میں خوشی کی لہر دوڑ گئی۔ کامیابی کی خوشی میں نومنتخب صدر عمران یونس گجر کے حامیوں نے انہیں کندھوں پر اٹھا لیا اور زبردست نعرے بازی کی۔ مٹھائیاں تقسیم کی گئیں، کارکنوں کو ہار پہنائے گئے اور ڈھول کی تھاپ پر خوب بھنگڑے ڈالے گئے۔ کارکنوں کا جوش و خروش دیدنی تھا اور پورا ماحول جشن کا سماں پیش کر رہا تھا۔

نومنتخب صدر چوہدری عمران یونس گجر نے اس موقع پر اپنے خطاب میں کہا کہ آج کی جیت کے بعد تمام لوگ ان کے لیے برابر ہیں، گروپنگ صرف انتخابات تک محدود تھی، اب سب مل کر تعلیمی ترقی اور بہتری کے لیے کام کریں گے۔

شاہین گروپ کے صدر جاوید ساقی نے بھی نومنتخب صدر چوہدری عمران یونس گجر اور چوہدری محمد آصف خان کو کامیابی پر دلی مبارکباد دی اور اس امید کا اظہار کیا کہ وہ اپنی ذمہ داریاں احسن طریقے سے نبھائیں گے۔