ڈسٹرکٹ ویٹرنری ہسپتال جہلم میں فوری طور پر آپریشن تھیٹر قائم کیا جائے، مویشی پال حضرات کا مطالبہ
جہلم کے ڈسٹرکٹ ویٹرنری ہسپتال میں فوری طور پر آپریشن تھیٹر قائم کرنے کا مطالبہ زور پکڑ گیا ہے۔ کسانوں اور مویشی پال حضرات نے محکمہ لائیو اسٹاک کے اعلیٰ حکام سے مطالبہ کیا ہے کہ مویشیوں کے علاج معالجے کے لیے بنیادی اور ضروری سہولیات کی فراہمی یقینی بنائی جائے تاکہ بیمار اور زخمی جانوروں کو بروقت اور کم خرچ طبی سہولیات مقامی سطح پر میسر آ سکیں۔
تفصیلات کے مطابق ڈسٹرکٹ ویٹرنری ہسپتال جہلم میں آپریشن تھیٹر کی سہولت موجود نہ ہونے کے باعث مویشی پال حضرات کو اپنے بیمار یا زخمی جانوروں کے پیچیدہ آپریشن اور دیگر ضروری علاج کے لیے نجی مراکز کا رخ کرنا پڑتا ہے، جہاں انہیں مبینہ طور پر انتہائی مہنگے داموں علاج کروانا پڑتا ہے۔
کسانوں اور مویشی پال حضرات کا کہنا ہے کہ غریب اور متوسط طبقے سے تعلق رکھنے والے افراد کے لیے جانوروں کے مہنگے آپریشن اور علاج معالجے کے اخراجات برداشت کرنا انتہائی مشکل ہو چکا ہے۔ ان کے مطابق بعض اوقات بروقت اور مناسب طبی سہولت دستیاب نہ ہونے کے باعث قیمتی مویشی جانبر نہیں ہو پاتے، جس سے مویشی پال خاندانوں کو شدید مالی نقصان کا سامنا کرنا پڑتا ہے۔
مویشی پال حضرات نے حکومت پنجاب اور محکمہ لائیو اسٹاک کے اعلیٰ حکام سے مطالبہ کیا ہے کہ ڈسٹرکٹ ویٹرنری ہسپتال جہلم میں جدید سہولیات سے آراستہ آپریشن تھیٹر قائم کیا جائے اور اس کے لیے ماہر ویٹرنری ڈاکٹرز کے ساتھ ضروری طبی و معاون عملہ بھی تعینات کیا جائے۔
انہوں نے مطالبہ کیا کہ ہسپتال میں جانوروں کے لیے جدید تشخیصی اور سرجیکل سہولیات فراہم کی جائیں تاکہ مختلف پیچیدہ طبی مسائل، حمل اور دیگر بیماریوں کی بروقت اور درست تشخیص ممکن ہو سکے اور جانوروں کو مناسب علاج کی سہولت مقامی سطح پر ہی فراہم کی جا سکے۔
کسانوں کا کہنا ہے کہ اگر ڈسٹرکٹ ویٹرنری ہسپتال میں آپریشن تھیٹر اور جدید طبی سہولیات فراہم کر دی جائیں تو مویشی پال حضرات کو نجی مراکز کے مہنگے علاج سے نجات مل سکتی ہے، جبکہ بروقت علاج کے ذریعے قیمتی مویشیوں کو نقصان سے بھی بچایا جا سکے گا۔
مویشی پال حضرات نے متعلقہ حکام سے مطالبہ کیا ہے کہ اس اہم مسئلے کا فوری نوٹس لیتے ہوئے ڈسٹرکٹ ویٹرنری ہسپتال جہلم میں آپریشن تھیٹر کے قیام اور ضروری سہولیات کی فراہمی کے لیے عملی اقدامات کیے جائیں۔
