محکمہ جنگلات جہلم کے پروٹیکشن آفیسر چوہدری الفت عباس اپنے عہدے سے ریٹائر ہو گئے

جہلم: محکمہ جنگلات جہلم کے فارسٹ پروٹیکشن آفیسر چوہدری الفت عباس اپنی مدتِ ملازمت مکمل کرنے کے بعد باعزت طور پر ریٹائر ہو گئے۔

چوہدری الفت عباس کے اعزاز میں ایک نجی میرج ہال میں سادہ مگر پروقار تقریب کا انعقاد کیا گیا، جس میں راولپنڈی، لاہور، خوشاب، جہلم اور چکوال سمیت مختلف اضلاع سے تعلق رکھنے والے فارسٹ افسران، معززین علاقہ اور مختلف مکاتبِ فکر سے وابستہ افراد نے بڑی تعداد میں شرکت کی۔

تقریب کے شرکاء نے چوہدری الفت عباس کی محکمہ جنگلات کے لیے گراں قدر خدمات کو زبردست خراجِ تحسین پیش کرتے ہوئے کہا کہ انہوں نے اپنی تمام تر ملازمت نہایت دیانتداری، فرض شناسی، محنت اور خلوصِ نیت کے ساتھ انجام دی۔

مقررین کا کہنا تھا کہ چوہدری الفت عباس کا شمار ان افسران میں ہوتا ہے جنہوں نے نہ صرف اپنی محکمانہ ذمہ داریاں احسن انداز میں نبھائیں بلکہ ماحول کے تحفظ اور شجرکاری کے فروغ کے لیے بھی نمایاں کردار ادا کیا۔

اس موقع پر ضلع خوشاب میں تعینات ڈویژنل فارسٹ آفیسر سدھیر احمد مغل نے خطاب کرتے ہوئے کہا کہ چوہدری الفت عباس محکمہ جنگلات کا ایک انمول ہیرا تھے، جن کی ایمانداری، خوش اخلاقی اور پیشہ ورانہ صلاحیتیں ہمیشہ یاد رکھی جائیں گی۔

انہوں نے کہا کہ چوہدری الفت عباس نے اپنی سروس کے دوران ہر مشکل ذمہ داری نہایت احسن انداز میں مکمل کی اور نوجوان افسران کے لیے عملی نمونہ بنے رہے۔

سدھیر احمد مغل نے مزید کہا کہ ایسے فرض شناس اور محنتی افسران کسی بھی ادارے کا قیمتی اثاثہ ہوتے ہیں۔ ان کی خدمات محکمہ جنگلات کی تاریخ کا روشن باب ہیں اور ان کی کمی ہمیشہ محسوس کی جائے گی۔

انہوں نے دعا کی کہ اللہ تعالیٰ چوہدری الفت عباس کو صحت، خوشی اور عزت کے ساتھ ریٹائرمنٹ کی نئی زندگی عطا فرمائے۔

تقریب کے اختتام پر چوہدری الفت عباس کا شکریہ ادا کیا گیا جبکہ شرکاء نے ان کے لیے نیک تمناؤں اور کامیاب و خوشحال زندگی کی دعا بھی کی۔