پنڈدادنخان: شہید سب انسپکٹر محمد اقبال کی 15ویں برسی کے موقع پر ڈی ایس پی پنڈدادنخان نے ان کی قبر پر حاضری دی، پھول چڑھائے اور ان کے بلند درجات کے لیے دعا کی۔
اس موقع پر پولیس کے چاق و چوبند دستے نے شہید کی لحد پر سلامی پیش کی، جس سے تقریب میں موجود افراد کے دل جذبۂ فخر اور احترام سے لبریز ہو گئے۔
سب انسپکٹر محمد اقبال 24 اپریل 2010 کو تھانہ صدر تلہ گنگ ضلع چکوال میں تعینات تھے۔ دورانِ گشت انہیں وائرلیس پر اطلاع ملی کہ احسان فلنگ اسٹیشن پر موجود NATO کے آئل ٹینکرز پر دہشت گردوں نے حملہ کر دیا ہے۔ آپ فوری طور پر موقع پر پہنچے، جہاں دہشت گردوں کی فائرنگ کے نتیجے میں جام شہادت نوش کیا۔ اُن کی یہ قربانی نہ صرف محکمہ پولیس بلکہ پوری قوم کے لیے قابلِ فخر ورثہ ہے۔
اس موقع پر ڈسٹرکٹ پولیس آفیسر جہلم طارق عزیز سندھو نے اپنے بیان میں کہا کہ شہداء پولیس ہمارے محسن ہیں جنہوں نے اپنی جانوں کا نذرانہ دے کر محکمہ پولیس کا سر فخر سے بلند کیا۔ انہوں نے کہا کہ شہید محمد اقبال جیسے بہادر اور نڈر افسران کی قربانیاں محکمہ پولیس کی تاریخ کا روشن باب ہیں، جنہیں کبھی فراموش نہیں کیا جا سکتا۔
ڈی پی او جہلم نے مزید کہا کہ پولیس افسران اور جوانوں کی قربانیاں ملک میں امن کے قیام کا ثبوت ہیں، اور ہم ان شہداء کے اہلِ خانہ کے ساتھ مکمل یکجہتی کا اظہار کرتے ہیں۔
-
-
-
-
