پنڈ دادنخان: ایس ایس پی اشرف مارتھ شہید کی 28ویں برسی کے موقع پر ڈی ایس پی پنڈ دادنخان اور ایس ایچ او تھانہ جلالپور شریف نے جہلم کی تحصیل پنڈدادنخان کے موضع سگھرپور، جلالپور شریف میں واقع شہید کی لحد پر حاضری دی، پھول چڑھائے اور درجات کی بلندی کے لیے دعا کی۔ پولیس کے چاک و چوبند دستے نے شہید کو سلامی پیش کی۔
یاد رہے کہ ایس ایس پی اشرف مارتھ شہید 6 مئی 1997 کو گوجرانوالہ میں دہشت گردوں کی اندھا دھند فائرنگ سے شدید زخمی ہو کر جام شہادت نوش فرما گئے تھے۔ ان کی بے مثال بہادری، فرض شناسی اور نڈر قیادت کے اعتراف میں حکومتِ پاکستان نے انہیں "ستارۂ شجاعت” سے نوازا جبکہ گوجرانوالہ پولیس لائنز کو ان کے نام سے منسوب کیا گیا ہے۔
ڈی پی او جہلم طارق عزیز سندھو نے اس موقع پر اپنے پیغام میں کہا کہ "شہداء ہمارے محسن ہیں، جن کی لازوال قربانیوں کی بدولت آج ہم امن و سکون سے زندگی گزار رہے ہیں۔” انہوں نے مزید کہا کہ شہداء کی قربانیاں ناقابل فراموش ہیں اور ان کے اہلِ خانہ کا خیال رکھنا ہماری اجتماعی ذمہ داری ہے۔
انہوں نے شہید ایس ایس پی اشرف مارتھ کو خراج عقیدت پیش کرتے ہوئے کہا کہ وہ ایک بہادر، نڈر اور پیشہ ور افسر تھے جن کی خدمات ہمیشہ یاد رکھی جائیں گی۔ ان کی شہادت پولیس فورس کے لیے مشعل راہ ہے۔
-
-
-
-
