اثریہ بوائز اسکول اینڈ کالج جہلم میں جشنِ آزادی کی شاندار تقریب کا انعقاد

جہلم: اثریہ بوائز اسکول اینڈ کالج جہلم میں جشنِ آزادی کی شاندار اور پُررونق تقریب کا انعقاد کیا گیا، جس میں طلبہ، اساتذہ اور معزز مہمانوں نے بھرپور شرکت کی۔

تقریب کے مہمانانِ خصوصی موٹر وے پولیس انسپکٹر مشاہد حسن اور ٹریفک پولیس انسپکٹر غلام شبیر تھے، جو اپنی ٹیم کے ہمراہ شریک ہوئے۔

تقریب کا آغاز تلاوتِ کلامِ پاک اور نعتِ رسول ﷺ سے ہوا۔ طلبہ کے درمیان تقریری مقابلہ اور "معلوماتِ پاکستان” کوئز کا انعقاد کیا گیا، جن میں نمایاں پوزیشنز حاصل کرنے والے طلبہ کو موٹر وے پولیس انسپکٹر مشاہد حسن نے انعامات سے نوازا۔ اس موقع پر افسران نے کہا کہ نوجوانوں کا حب الوطنی کا جذبہ ملک کا قیمتی سرمایہ ہے۔

تقریب میں رنگا رنگ ٹیبلوز، ملی نغمے اور پاکستان سے محبت پر مبنی شاعری پیش کی گئی، جنہیں حاضرین نے بے حد سراہا۔ بعدازاں پرنسپل محمد زاہد خورشید، ایڈمن بدر خورشید اور اساتذہ کی موجودگی میں مہمان خصوصی نے کیک کاٹا اور پرچم کشائی کی، جہاں شرکاء نے قومی ترانہ یک زبان ہو کر پڑھا۔

تقریب کے اختتام پر پرنسپل محمد زاہد خورشید نے بہترین کارکردگی دکھانے والے طلبہ کو کیش انعامات اور شیلڈز پیش کیں اور پروگرام کی کامیابی پر اساتذہ و طلبہ کا شکریہ ادا کیا۔ انہوں نے وطن عزیز کی سلامتی، ترقی اور پاک فوج کے لیے خصوصی دعا بھی کی۔