اختیارات سے تجاوز اور شہریوں سے بدتمیزی سے پیش آنے والے پولیس افسران سے کوئی رعایت نہیں برتی جائے گی، آر پی او بابر سرفراز الپا

جہلم: ریجنل پولیس آفیسر راولپنڈی ریجن بابر سرفراز الپا نے ضلع جہلم کا دورہ کیا۔

پولیس لائن جہلم آمد پر چاق و چوبند دستے نے سلامی پیش کی، آر پی او راولپنڈی نے ڈی پی او جہلم کے ہمراہ یادگار شہدا کا دورہ کیا جہاں انہوں نے پھول چڑھائے اور شہدا کی بلندی درجات کے لئے دعا کی۔

آر پی او راولپنڈی کی زیر صدارت دفتر پولیس جہلم میں کرائم میٹنگ کا بھی انعقاد کیا گیا، میٹنگ میں ڈی پی او جہلم ، ایس پی انویسٹی گیشن ،جملہ ڈی ایس پیز اور ایس ایچ اوز نے شرکت کی۔

ڈی پی او جہلم ناصر محمود باجوہ نے ضلع جہلم کے متعلق عمومی جبکہ ضلع کے کرائم کی مجموعی صورتحال سے متعلق خصوصی بریفنگ دی۔

آر پی او بابر سرفراز نے کہا کہ ایس ڈی پی اوز اور ایس ایچ اوز خصوصی دلچسپی لیتے ہوئےتفتیش کو خود سپروائز کریں، ناقص تفتیش پر باز پرس ہو گی۔ حکومت پنجاب کی ہدایات پر جاری کردہ خصوصی مہمات برخلاف اشتہاری ملزمان،منشیات فروشوں کے خلاف ایکشن اور پتنگ بازی کے انسداد کے لیے موثر کریک ڈاؤن کریں۔

انہوں نے کہا کہ تمام افسران اپنی ماتحت پولیس فورس کی ویلفیئر کے لیے ہر ممکن اقدامات عمل میں لائیں،پولیس افسران کا طرزعمل ماتحتان کے ساتھ فیملی ممبر کی طرح ہونا چاہیے۔ پولیس افسران دفاتر اور تھانہ جات میں عوام کے ساتھ خوش اخلاقی اور خندہ پیشانی سے پیش آئیں ،اختیارات سے تجاوز اور عوام الناس سے بدتمیزی سے پیش آنے والے افسران سے کوئی رعایت نہیں برتی جائے گی۔

آر پی او راولپنڈی ریجن بابر سرفراز الپا نے تھانہ دینہ کا بھی دورہ کیا جہاں انہوں نے تھانہ کی بلڈنگ ،فرنٹ ڈیسک، حوالات ، مالخانہ تھانہ کا معائنہ ، ریکارڈ کا بھی جائزہ لیا۔

اس موقع پر آر پی او راولپنڈی بابر سرفراز الپا نے کہا کہ شہریوں کو انصاف کی فراہمی ،میرٹ پر تفتیش، مقدمات کی بروقت یکسوئی اور پبلک سروس ڈیلیوری کے اعلی معیار سے ہی جہلم پولیس ایک بہترین پولیس کہلانے کے لائق ہو سکتی ہے۔