جہلم میں پریشر ہارن کا بے جا استعمال شہریوں کے لیے وبالِ جان بن گیا
جہلم شہر سمیت ضلع بھر میں گاڑیوں میں نصب پریشر ہارن شہریوں کے لیے شدید پریشانی کا باعث بننے لگے ہیں، جس کے نتیجے میں ڈپریشن کے مریضوں کی تعداد میں خطرناک حد تک اضافہ ہو رہا ہے۔
تفصیلات کے مطابق جہلم، دینہ، سوہاوہ، پنڈدادنخان اور مضافاتی علاقوں میں چلنے والی ٹرانسپورٹ پر پریشر ہارن کے بے جا استعمال نے شہریوں کی زندگی اجیرن کر دی ہے۔ گھروں کے اندر بیٹھے شہری بڑی بسوں، ٹرکوں اور ٹریکٹرز کی خوفناک آوازیں سننے پر مجبور ہیں، جس سے نہ صرف ان کی سماعت اور اعصاب متاثر ہو رہے ہیں بلکہ ذہنی امراض میں مبتلا ہونے کے واقعات میں بھی اضافہ ہو رہا ہے۔
ٹریفک پولیس کی عدم توجہی کے باعث شہر اور قصبات میں پریشر ہارن کے استعمال کو روکنے کے لیے کوئی عملی اقدامات نہیں کیے جا رہے، جس کی وجہ سے حالات مزید بگڑ رہے ہیں۔ گاڑیوں، موٹرسائیکلوں اور ہائی ایسز پر لگے پریشر ہارن ڈپریشن کے مریضوں کی تعداد میں روز بروز اضافے کا سبب بن رہے ہیں۔
شہریوں نے ڈسٹرکٹ پولیس آفیسر محمد طارق عزیز سندھو سے اپیل کی ہے کہ وہ فوری نوٹس لیتے ہوئے گاڑیوں سے پریشر ہارن اتروانے کے لیے موثر کارروائی کریں تاکہ شہری سکون سے زندگی گزار سکیں۔
