اسسٹنٹ کمشنر جہلم کا تاریخی گرودوارہ بھائی کرم سنگھ کا دورہ، ترقیاتی امور کا جائزہ لیا

جہلم: ڈپٹی کمشنر جہلم میر رضا اوزگن کی خصوصی ہدایت پر اسسٹنٹ کمشنر جہلم نے ریلوے روڈ پر واقع تاریخی وقف جائیداد “گرودوارہ بھائی کرم سنگھ” کا دورہ کیا اور وہاں جاری ترقیاتی و انتظامی امور کا تفصیلی جائزہ لیا۔

رپورٹ کے مطابق دورے کے دوران گرودوارے کی توسیع، تزئین و آرائش اور انتظامی معاملات سے متعلق پیش رفت کا معائنہ کیا گیا جبکہ سکھ یاتریوں کیلئے سہولیات کی بہتری پر بھی غور کیا گیا۔

اس موقع پر اسسٹنٹ کمشنر جہلم نے متعلقہ محکموں کے افسران کے ہمراہ ایک اہم اجلاس کی صدارت بھی کی تاکہ تمام امور کو باہمی مشاورت کے ذریعے بہتر انداز میں حل کیا جا سکے۔

اجلاس میں چیف آفیسر ایجوکیشن نازیہ شہزادی، ڈسٹرکٹ ایجوکیشن آفیسر ایلیمنٹری جہلم عطیہ حمید، اسسٹنٹ ایڈمنسٹریٹر ای ٹی پی بی محمد اسحاق، چیف آفیسر میونسپل کمیٹی محمد طارق ضیاء اور ایس ڈی او بلڈنگ نصر اللہ خان نے شرکت کی۔

شرکاء نے گرودوارہ سے ملحقہ اراضی اور قریبی تعلیمی ادارے کی موجودہ صورتحال کا تفصیلی جائزہ لیا جبکہ جاری ترقیاتی کاموں پر بھی تبادلہ خیال کیا گیا۔

دورے کے اختتام پر اسسٹنٹ کمشنر جہلم نے گرودوارہ سے ملحقہ خالی اراضی کو کسی بھی ممکنہ قبضے سے محفوظ بنانے کیلئے فوری طور پر محکمہ متروکہ وقف املاک بورڈ (ETPB) کے سپرد کرنے کی ہدایت جاری کی۔

محکمہ متروکہ وقف املاک کے نمائندے نے تمام تجاویز سے اتفاق کرتے ہوئے حتمی منظوری کیلئے سفارشات صوبائی دفتر لاہور بھجوانے کا اعادہ کیا۔