پنڈدادنخان: بار ایسوسی ایشن پنڈدادنخان نے للِہ تا جہلم ڈیول کیرج وے منصوبہ میں تاخیر اور فنڈز جاری نہ کرنے پر ہڑتال کی دھمکی دے دی ہے۔
وزیر اعلیٰ پنجاب مریم نواز کو لکھے گئے خط میں وکلاء کا کہنا ہے کہ بار ایسوسی ایشن پنڈدادنخان، للِہ جہلم ڈیول کیرج وے منصوبہ پر فنڈز کے اجراء اور کام کے آغاز میں غیر معمولی تاخیر پر اپنی شدید تشویش کا اظہار کرتی ہے۔ یہ منصوبہ خطے کی سماجی اور اقتصادی ترقی کے لیے انتہائی اہمیت کا حامل ہے۔
وکلاء کا کہنا ہے کہ حکومت کی طرف سے بار بار کی یقین دہانیوں اور وعدوں کے باوجود منصوبہ میں تاخیر نے علاقے کے لوگوں کو بے پناہ مایوسی اور معاشی نقصان پہنچایا ہے۔ سڑک مکمل نہ ہونے کی وجہ سے عوام کو شدید تکلیف، حادثات اور علاقائی ترقی میں تعطل کا سامنا ہے۔
وکلاء نے مطالبہ کیا ہے کہ منصوبے کے لیے مختص فنڈز کا فوری اجرا کیا جائے اور مزید تاخیر کے بغیر تعمیراتی کام کا آغاز کیا جائے۔ نیز منصوبے کی تکمیل کے لیے ایک واضح ٹائم لائن عوام کے ساتھ شیئر کی جائے۔
جنرل سیکرٹری بار ایسوسی ایشن پنڈدادنخان چوہدری عامر شہزاد گھاوں کا کہنا ہے کہ اعلی حکام کو خط موصول ہونے کے سات دنوں کے اندر ہمارے مطالبات کو حل نہ کرنے کی صورت میں بار ایسوسی ایشن پنڈدادنخان ہڑتال اور احتجاج کی کال دے گی۔ اس میں عدالتی کارروائی کا غیر معینہ مدت تک بائیکاٹ کرنا اور حکومت پر اپنی ذمہ داریاں پوری کرنے کے لیے دباؤ ڈالنے کے لیے عوامی حمایت کو متحرک کرنا شامل ہے۔
انہوں نے کہا کہ اعلی حکام کو چاہیے کہ وہ ایسے انتہائی اقدامات سے بچنے کے لیے فوری اور موثر اقدامات کریں۔
-
-
-
-
