للِہ تا جہلم ڈیول کیرج وے کی تعمیر میں تاخیر، عوام کو شدید مشکلات

پنڈدادنخان: للِہ تا جہلم ڈیول کیرج وے پر کام کا آغاز نہ ہونے کے باعث عوام کو سفری مشکلات کا سامنا ہے۔ زیرِ تعمیر جلالپور کنال کے متبادل راستے سے پبلک ٹرانسپورٹ کو گزرنا پڑ رہا ہے، جس سے مسافروں کو دشواریوں کا سامنا کرنا پڑ رہا ہے۔

جلالپور شریف سے مصری موڑ تک سڑک کی خراب حالت نے ٹرانسپورٹرز کو جلالپور کنال کے راستے اپنی گاڑیاں گزارنے پر مجبور کر دیا ہے۔ تاہم، کنال انتظامیہ کی جانب سے بعض اوقات راستے کی بندش عوام کے لیے مزید مسائل پیدا کر دیتی ہے۔

عوامی حلقوں نے حکومتی وعدوں کی تکمیل میں تاخیر پر مایوسی کا اظہار کیا ہے۔ بتایا گیا ہے کہ للہ جہلم ڈیول کیرج وے کے لیے فنڈز دسمبر میں جاری کیے گئے تھے اور 5 جنوری کو تعمیراتی کام کا آغاز ہونا تھا، لیکن یہ وعدہ تاحال پورا نہیں ہو سکا۔

ذرائع کے مطابق، سڑک کی تعمیر کا کام اب جنوری کے آخر میں شروع ہونے کا امکان ہے۔ شہریوں نے مطالبہ کیا ہے کہ حکومت فوری طور پر اس منصوبے پر کام کا آغاز کرے تاکہ سفری سہولتیں بحال ہو سکیں اور عوام کی مشکلات ختم ہو سکیں۔