ضلع جہلم میں اوورلوڈ گاڑیوں کے خلاف بڑے پیمانے پر کریک ڈاؤن کا آغاز کیا جا رہا ہے، ثانیہ صفی

جہلم: ایڈیشنل ڈپٹی کمشنر ریونیو جہلم ثانیہ صفی نے کہا ہے کہ سڑکوں پر بڑھتے ہوئے حادثات کی روک تھام اور انسانی جانوں کو محفوظ بنانے کے لیے تمام ضروری اقدامات فوری طور پر عمل میں لائے جا رہے ہیں۔ اوورلوڈ گاڑیوں کے خلاف ضلع بھر میں بڑے پیمانے پر کریک ڈاؤن کا آغاز کیا جا رہا ہے۔

یہ بات انہوں نے روڈ سیفٹی کے حوالے سے منعقدہ اہم اجلاس کی صدارت کرتے ہوئے کہی، جس میں ریسکیو 1122، موٹروے پولیس، روڈ ٹریفک اتھارٹی، اسسٹنٹ کمشنرز، دیگر متعلقہ محکموں کے افسران اور سماجی تنظیموں کے نمائندگان نے شرکت کی۔

اجلاس کے دوران جی ٹی روڈ پر اوورلوڈ گاڑیوں کے باعث ہونے والے حادثات، موٹر سائیکل سواروں کی جانب سے ٹریفک قوانین کی خلاف ورزی، اور سڑکوں کی خستہ حالی کے حوالے سے تفصیلی بریفنگ دی گئی۔

ایڈیشنل ڈپٹی کمشنر ریونیو ثانیہ صفی نے اجلاس سے خطاب کرتے ہوئے ہدایت کی کہ حکومت پنجاب کی ہدایات کی روشنی میں تمام متعلقہ ادارے فوری ایکشن لیں۔ اوورلوڈنگ کے خلاف بلا امتیاز کارروائی کی جائے، جبکہ موٹر سائیکل سواروں کی جانب سے ون وے اور ہیلمٹ قوانین کی خلاف ورزی پر ٹریفک پولیس سخت کارروائی عمل میں لائے۔

انہوں نے مزید کہا کہ جی ٹی روڈ اور دیگر اہم شاہراہوں پر جن مقامات پر سڑکوں کی حالت خستہ ہے، وہاں فوری مرمت کے لیے ٹھوس لائحہ عمل تیار کیا جائے تاکہ حادثات کی روک تھام ممکن ہو سکے۔