ضلع جہلم میں پنجابی ثقافت کا دن بھرپور جوش و خروش سے منایا گیا

جہلم: پنجاب حکومت کی خصوصی ہدایات کے تحت پنجاب بھر کی طرح ضلع جہلم میں بھی پنجابی ثقافت ڈے بھرپور جوش و جذبے کے ساتھ منایا گیا۔ اس دن کو منانے کا مقصد پنجابی ثقافت کے خوبصورت رنگوں کو اجاگر کرنا اور دنیا بھر میں اس کی پہچان کو فروغ دینا تھا۔

ضلع جہلم کے مختلف تعلیمی اداروں، سرکاری دفاتر، کالجوں اور سکولوں میں اس دن کی مناسبت سے خصوصی تقریبات کا انعقاد کیا گیا۔ افسران، اساتذہ، ملازمین، طلبہ و طالبات نے پنجاب کے روایتی لباس مثلاً پگ، دھوتی، لاچا اور کرتا زیب تن کیے اور ثقافتی جوش و خروش کے ساتھ پنجابی کلچر ڈے منایا۔

گورنمنٹ ہائی سکول جہلم، گورنمنٹ اسلامیہ ہائی سکول، تبلیغ الاسلام سکول، گورنمنٹ ڈگری کالج ٹلیانوالہ سمیت دیگر اداروں میں رنگا رنگ تقاریب کا اہتمام کیا گیا۔ اسی طرح میونسپل کمیٹی جہلم، ڈی سی آفس، اور دیگر اہم سرکاری دفاتر میں بھی پنجابی ثقافت کی جھلک نمایاں طور پر نظر آئی۔

ثقافتی دن کی تقریبات میں پنجاب کے مخصوص کھانوں کا بھی اہتمام کیا گیا، جنہیں شرکاء نے بھرپور ذوق و شوق سے انجوائے کیا۔ اساتذہ اور ایڈمنسٹریٹو اسٹاف نے خود بھی پنجابی لباس پہن کر ثقافت کے فروغ میں اپنا حصہ ڈالا۔

پنجابی کلچر ڈے منانے والے افراد نے اس دن کو پنجاب کی روایتی اقدار، بھائی چارے اور محبت کے پیغام کے طور پر منایا اور کہا کہ ایسے دن نہ صرف ثقافت سے جڑے رہنے کا ذریعہ بنتے ہیں بلکہ نئی نسل کو اپنی روایات سے روشناس کروانے میں بھی اہم کردار ادا کرتے ہیں۔